Islamski ekstremisti počinili masakr u Nigeriji

Najnovije vijesti

Islamski ekstremisti počinili masakr u Nigeriji

Na stotine tijela, koja se ni ne mogu prebrojati, i dalje leže razbacana po šumi, nakon napada koji su trajali od srijede do petka, prenosi AP

Islamski ekstremisti su u Nigeriji počinili najstravičniji masakr u istoriji islamističkog pokreta Boko Haram, sravnivši sa zemljom cio grad na granici sa Čadom i usmrtivši 2.000 ljudi, navodi organizacija Amnesti internešenel.

Na stotine tijela, koja se ni ne mogu prebrojati, i dalje leže razbacana po šumi, nakon napada koji su trajali od srijede do petka, prenosi AP.

Načelnik tog distrikta Baba Aba Hasan je rekao da su žrtve pretežno djeca, žene i stariji ljudi koji nijesu uspeli da pobjegnu dovoljno brzo kada su pobunjenici upali u Bagu, ispaljujući granate i pucajući iz jurišnih pušaka na stanovnike.

U pobuni koja traje već pet godina ubijeno je više od 10.000 ljudi samo prošle godine, a više od milion ljudi raseljeno je po Nigeriji, dok je na stotine hiljada njih pobjeglo preko granice u Čad i Kamerun, podsjeća američka agencija, a prenosi Tanjug.